Saida mak Kompeténsia?

Liafuan dia kompeténsia ne’e ninia orijen mai husi Lian Latina, “competentia” iha ne’ebé forma husi liafuan “com” katak hamutuk no “petere” katak buka ka koko ka husu. Nune’e signifikadu tomak husi liafuan kompeténsia katak nia iha relasaun ho ideia ida katak atu buka buat ruma hamutuk ho ema seluk, ka parte barak ne’ebé buka ka halo disputa atu atinje objektivu ida.

Iha Lian Latina termu ida kompeténsia ne’e ninia signifikadu ne’e luan tebes, nune’e, ho tempu, sentidu husi liafuan ida ne’e refere tiha ba fali ema ida-nia kapasidade, abilidade ka aptidaun atu realiza buat ruma. Iha Lian Portugés no mós Lian Tetun, termu ida ne’e refere ba buat rua, ida mak ema-nia abilidade no ida seluk mak esforsu husi ema barak atu atinji objektivu ida. Liafuan ida kompeténsia ne’e mai husi verbu “competir” katak atu kompete iha Lia Portugés, no husi liafuan ida ne’e mak hamosu termu sira seluk hanesan tuirmai ne’e:

  • Kompetisaun: refere ba hahalok ida atu kompete, baibain iha kontekstu desportivu, edukasaun, nst. Purezemplu kompetisaun hakerek, jogu, nst.
  • Kompetitivu: adjektivu ne’ebé uza atu deskreve buat ruma ne’ebé relasiona ho kompetisaun, ka karakterístika ida, iha ne’ebé, ema la fó fatin ba malun, ka lakohi lakon ho kompetitor seluk.
  • Kompetitor: refere ba iha ema ka entidade ruma ne’ebé partisipa iha kompetisaun.
  • Kompetitividade: refere ba iha kapasidade atu kompete, dalabarak relasiona ho efisiénsia, inovasaun no kualidade seluk.
  • Kompetente: adjektivu ne’ebé deskreve ema ruma ne’ebé iha abilidade, koñesimentu no kualifikasaun nesessáriu atu realiza tarefa ka kompete iha área espesífika ruma.

Leave a Reply